ई 15 नवंबर के झारखंड 10 बरिस कर होय गेलक। धरती आबा कर जनम दिन आउर राइज कर थापना दिवस, दुइयो एके दिन बड़ धूमधाम से गोटा झारखंड में मनाल गेलक। नवाँ आउर पुरना, सभे मुख्यमंत्री, मंत्री आउर बिधायक-सांसदमन संगे गनमान अदमीमन राइज कर बिकास ले संकलप लेलयँ। मुदा ई सवाल उपरे फिर कोनो बहस नइ होलक कि झारखंड में जे लूट हय, सोसन हय, बदहाली हय, उके खतम करे ले का करेक होवी इया का करल जाइ?

संताली कर नाँव बाजल लेखक बोयहा विश्वनाथ टुडू के अकादमी बट ले बाल साहित ले सनमान देवल जाय हे। बाल दिवस पर 14 नवंबर के दिल्ली में आयोजित एगो भब्य सनमान समारोह में केन्द्रीय साहित अकादमी कर अध्यक्ष सुनील गंगोपाध्याय उनके 50 हजार रुपिया नगद, प्रतीक चिन्हा आउर प्रसस्ति-पत्र प्रदान करलयँ।