एखन तक बिरसा मुण्डा आउर उनकर आंदोलन उलगुलान ऊपरे तीन ठो फिलिम बइन हे। इकर अलावा काय ठो टीवी सिरियल के हों बनेक कर सूचना हय। लगिन बिरसा आबा आउर उलगुलान एगो अइसन बिसय हय जे सउब कोइ के अपन दने खीेंचेला। आब सुनेक में आवत हे कि कोलकाता में हों बिरसा मुण्डा ऊपरे एगो फिलिम कर निर्मान प्रगति पर हय। हलांकि बिरसा ऊपरे बनल तीनो फिलिम कोनो खास नइ चललक आउर दर्सकमन उके ठुकराय देलयँ। देखेक ई हय कि कोलकाता कर बिरसा कोनो कमाल देखायक पारबयँ कि नइ।
कोलकाता कर फिलिम कंपनी आरबी प्रोडक्शन से मिलल सूचना कर मोताबिक ‘धरती आबा बिरसा मुण्डा’ कर शूटिंग आउर निर्मान कर काम जोर-सोर से चलतहे। ई फिलिम मुध रूपे संताली भासा में बनत हे लगिन इकर हिंदी डब भी रिलीज करल जाइ। फिलिम कर शूटिंग झारखंड, उड़ीसा आउर पछिम बंगाल कर काय ठो ऐतिहासिक लोकेसन पर करल जाहे। इकर निर्देशन अजीत बनर्जी करत हयँ जाबकि प्रतीम चटर्जी, बिप्लव, साम मरांडी, राजीव बाल, हिमांशु आउर राधा मरांडी मुध अभिनेता-अभिनेत्राी हेकयँ। फिलिम 2009 में रिलीज होयक कर उमेइद हके।